بشوية فلوس

بشوية فلوس تدمر ثقافة جيل

   كنت متابعة طبعاً فى رمضان المسلسل اللى تقريباً الكل تابعه والحقيقة إنى ماليش إرتباط كبير بالتليفزيون المهم المسلسل إتأخر فى اليوم ده قلت ألف أشوف أيه اللى على القنوات المهم لسة بأقلب على قناة تانية لقيت برنامج  طبعاً كلنا سمعنا عنه المهم قلت أهو أخد ثواب والله ما أنا سامعة المسلسل النهاردة وقلت حاجة تفيدنى المهم لقيتهم بيتكلموا على الناسخ والمنسوخ والعنوان ده كنت سمعت عنه كتير بس معناه أيه معرفشى المهم قلت فرصة أعرف المهم قعدت أسمع وكلام الضيف المهندس لقيته بيتكلم بثقة صراحة ماليش إنى أفتى أول مرة أسمع الموضوع ومعرفشى حاجة عنه قمت بعد البرنامج فتحت مواقع كتير عن الموضوع ولقيت كل اللى بيقوله وكل اللى سمعته منه كله غلط.
  
   ولما إتناقشت مع غيرى فى الموضوع ده قالولى إن الشخص ده قرآنى وده مصطلح كنت أول مرة أسمعه فسألت يعنى أيه قرآنى قالولى "شخص يؤمن بكتاب الله لكن لايؤمن بسنة رسوله" .

   أكيد ناس كتير ميعرفوش يعنى أيه قرآنى وميعرفوش يعنى أيه ناسخ ومنسوخ ولا يمكن أنا الوحيدة.

   المشكلة بس إنى لما نزلت يوميها أصلى التراويح فى المسجد لقيت إن فى ناس بسيطة جداً بتتفرج على القنوات دى تفتكروا ثقافتهم الغلط مين هيتحاسب عليها.

   هى المشكلة مش فى موقف واحد حصل ليا وأنا أصلاً مش بتفرج قد كدا على التليفزيون أنا باتكلم على قنوات كتير وعلى برامج أكتر يالا كله خير.

   وفى الأخر عاوزة أقول حسبى الله ونعم الوكيل فى الإعلام بتاعنا بيهدم ثقافة جيل كام عشان خاطر شوية فلوس.